Margt er undarlegt í kýrhausnum...

X: Góðan daginn. Hr. X heiti ég á rannsóknardeild Símans og er að leita að Helga Þórðarsyni.
Y: Góðan daginn ungi maður. Ég er búin að reyna að hafa uppi á honum í nokkra daga nefnilega. Hann ætlaði nefnilega að leigja íbúðina mína, var búinn að borga inn á tryggingu en hefur ekki látið í sér heyra í nokkurn tíma.
X: Já, hann ætlaði nefnilega að taka þátt í tilraun hjá okkur með nettengingu og ég þarf að hafa uppi á honum vegna þess máls.
Y: Já, ég er sjálf búin að fara á Símann, á Hagstofuna og Lögregluna til að leita að honum og þeir á lögreglunni voru meira að segja bara dónalegir við mig. Hann gaf upp heimilisfang að Funabakka en þar kannast enginn við hann. Hann var búinn að borga inn 25 þúsund og ætlaði að flytja inn 1. ágúst en ég vildi bara fá þetta á hreint áður en ég flyt út.
X: Já, nei ég kannast ekki við þetta mál.
Y: Hann kom svo ósköp viðkunnalega fyrir sjónir en svo bara krossbrá mér þegar ég sá þessa þeldökku konu hans. Ekki það að ég sé einhver rasisti en...
X: Ég veit ekki hvað ég get hjálpað þér en ef ég finn hann þá skal ég segja honum að hafa samband við þig hið fyrsta.
Y: Já, það er gott því ég var að velta fyrir mér að leita til Rannsóknarlögreglunnar eða Útlendingaeftirlitsins til að finna hann.
X: Ég efast nú um að þeir geti mikið hjálpað þér en ég skal láta þig vita ef ég finn hann. Held það væri hyggilegast fyrir þig að bíða eftir að hann hafi samband næstu daga, alla vega þangað til fresturinn sem þú gafst honum rennur út. Ef hann lætur ekki heyra í sér þá hirðir þú bara þennan pening og finnur þér annan leigjanda.
Y: Já, þakka þér kærlega fyrir ungi maður!
X: Já, vertu blessuð!

Saga þessi gerist fyrir hálftíma síðan þegar samstarfsmaður minn var að reyna að hafa samband við þátttakanda í VDSL tilrauninni okkar. Ég gaf honum upp vitlaust símanúmer (0 varð að 6 í númerinu) og þetta samtal varð niðurstaðan. Kellingin var eins og gefur að skilja ekki að reyna að ná í téðan Helga og var endalaust lengi að skilja að um misskilning væri að ræða þegar við hringdum í hana aftur til að skýra málið. Hún vildi að við flettum upp á einhverju til að finna hann nefnilega... Já, það er margt skemmtilegt sem upp kemur í daglega lífinu!

Hlandsmóti skauta lokið!
Jæja, þá er hinu margrómaða landsmóti íslenskra skáta að Tryggva-Hömrum lokið eftir mikið streð. Var undirritaður yfirmaður hikedagskrár og var endalaus fjöldi gríslinga sem endilega vildi ganga um hin annars ágætu hálendi Tröllaskagans.
Þoka gerði göngugörpunum lífið leitt suma dagana og sökum slælegrar kompásaþekkingar (ekki bara Baskinn sem þjáist af því heilkenni) enduðu æði margir hópar á því að týnast á Súlumýrunum góðu. Þó skiluðu sér flestir tilbyggða að lokum og einungis þurfti að leita að tveimur hópum og fannst annar þeirra rétt sunnan girðingarinnar suð-vestan Fálkafells og hinn í svarta þoku kl 00:30 á miðri leið milli Gamla og Fálkafells eftir að undirritaður hafði kennt þeim kúrsinn Áttaviti 101 í gegnum síma við rætur Súlna.
Engin alvarleg slys urðu á fólki en þó þótti all kímið að hópur af Bretum á leið á Súlur kvartaði undan slælegum gæðum landakorta sem í boði voru. Fannst punktar ekki nógu nákvæmir og fannst þeir ekki þekkja merkingar á kortinu. Ég hafði þá rissað upp leiðina yfir mýrarnar og vestur fyrir á stikuðu leiðina með penna og þeim fannst það algjör hneysa. Ég sagði þeim að stikaða leiðin væri brött á köflun en þetta væri þó bara ganga alla leiðina. Talaði ég við Kana nokkra sem höfðu farið sömu leið en þeir sáu téða Breta vera að fara upp austurhlíðarnar sem eru snarbrattar og mjög varasamar. Bretarnir sögðust hafa lent í klettabeltum og snarbröttum snjóbrekkum og verið í stórhættu. OK, fair enough en sagði ég ykkur ekki að þetta væri GÖNGULEIÐ og af hverju í andsk**num sneruð þið ekki við þegar í slíkt óefni var komið. Asnar. Kanarnir töldu líklegt að Bretarnir hefði hunsað mínar leiðbeiningar og farið upp hreppamörkin milli Akureyrar og Öngulstaðahrepps sem eru einmitt auðkennd með brotalínu upp austur-hlíðar fjallsins...
Svo annað sem er reyndar mér að kenna er að ég sendi þrjá gaura kortalausa upp á Vaðlaheiði, upp Bíldsárskarð suður heiðina og niður í Garðsárdal. Þeir lentu í snarbröttum giljum og voru í stórhættu ef marka má lýsingar þeirra. Komu allir tjónaðir heim. Einn var með illa tognaðan úlnlið, einn með tjón á hné og einn með hendina í fatla og illa skrámaður á framhandlegg. Þetta verð ég að taka á mig því ég hefði aldrei átt að senda þá á þetta svæði því ég hef aldrei farið þarna niður sjálfur en hafði sýnst þetta ósköp saklaust úr fjarlægð. En sem betur fer slasaðist enginn alvarlega og strákarnir enduðu í kræsingum hjá ömmu og afa eins þeirra á Ytri-Tjörnum.
En annars skemmti ég mér alveg konunglega á þessu móti þó svo að fyrstu dagarnari hefðu verið mjög erfiðir sökum skipulagsleysis og ýmissa vandamála við undirbúning mótsins. Synd að þið skylduð allir flýja af hólmi upp á hálendið...

Þetta er ágætis lýsing hjá gulla á ferðinni.
Ég get þó fullyrt að lýsing marinós af ferðinni hefði verið mikið skemmtilegri, því gulli dregur heldur úr lýsingum á vissum hlutum. má þar t.d. nefna:
1 hversu ömurlegt er að hossast yfir urðarháls í þoku
2 hversu ógeðslega piss-stútfullur ónafngreindur tvíburi var í nýjadal, þ.e. áður en hann drapst á flugbellinum
3 hvað laugin í hlandmannalaugum var yndislega góð og hvað það var hrikalega mikið af fólki þar.
4 hversu svakaleg stemning var hjá okkur í eldgjá og fallegt að fjallabaki
5 hvað það er hægt að fá gómsætan hamborgara í hrauneyjum
6 hvað ónafngreindur össalingur og ónafngreindur baski voru orðnir rosalega miklir vinir eftir 11 klukkutíma hristing frá helvíti á mordor-heiðinni

takk fyrir ferðina strákar, góð ferð.

p.s. persónur í frásögninni eru ekki nafngreindar (og heita í raunveruleikanum eitthvað allt annað) til þess að koma í veg fyrir að lesendur viti um hverja er verið að ræða og svo að engum sárni nú.

Zhúkkuferðin mikla
Ætli ég taki það ekki að mér að skrifa litla tölu um þessa merku ferð svo að þeir sem ekki fóru geti fylgst með atburðum líðandi stunda.
Hófst reisan í allblautu veðri á miðvikudaginn síðastliðin og var þá ekið sem leið liggur frá Akureyri gegnum Reykjahlíð upp að Herðubreið þangað sem var komið um 02:00 um kvöldið. Var þá slegið upp tjaldbúð (Naminu) og er þar helst frá að segja loftgati sem Kristján gerði á tjaldið. Skeggrætt var um hvort að fara ætti Gæsavatnaleið, en sökum bleytu ber manni að fara þá leið snemma dags svo maður tíni ekki bílnum sínum í Flæðunum. Það að vakna klukkan 07:30 þótti mönnum ofraun og var risið úr rekkju um hádegisbil. Ekki létum við það hindra okkur í að fara Gæsavatnaleið sem n.b. byrjaði mjög vel, við þeystum á söndunum á hátt í 100 km/klst hraða og þótt mönnum vel. Flæðurnar reyndust okkur ekki mikill farartálmi, en Urðarhálsinn reyndist verri. "Vegurinn", klöpp með stikum, var ekki fljótfarinn og tók þetta dágóða stund. Tveir snjóskaflar urðu á vegi okkar, en ekki urðu þeir vesen. Hittum Hreinsa Skagfjörð í Gæsavatnaskála og enduðum ferðina þennan daginn í Nýjadal. Jóhann tók þar vel á móti okkur, við steiktum búrger og teiguðum ölhins. Eiríkur fékk sér reyndar "jógúr"(austurrískt áfengi sem enginn vissi hvað var). Endaði þetta ágæta kvöld á flugbreutarferð í Nýjadal sem þó reyndist mönnum mismunandi erfitt sökum vissrar ölvunnar. Seint næsta dag var haldið suður á land og var það tíðindalítið, keyrðum í Landmannalaugar, fórum í laugina, áttum langlokur sem keyptar voru í skólabíl sem reyndist vera verslun og keyrðum áfram niður í Eldgjá. Þar er víst bannað að tjalda og töldum við svo vera til þess að spilla ekki gróðri þannig að við tjölduðum á bílastæðinu. Þá nóttina var gengið innað Ófærufossi þar sem Finninn ákvað að berhátta og synda í hylnum undir fossinum, Longarinn og Baskinn gátu ekki verið minni menn þannig að þeir fylgdu á eftir en litu þó nokkuð kuldalegar út þegar á bakkann var komið á nýjan leik. Daginn eftir var ræs um áhdegisbilið, að vanda, og þá mætti okkur á bílastæðinu margmenni fólks sem komið var að skoða fossinn svo að við flúðum hið fyrsta. Ókum niður að Hrauneyjum og á korti sáum við vegslóða sem lá frá Sigöldu að Kerlingarfjöllum og hugsuðum við okkur gott til glóðarinnar og hugðumst við gista á Hveravöllum það kvöldið. Hófst þar Mordor hið illa. Hófst þar vegur ekki ósvipaður þeim er lýst var hér að framan frá Urðarhálsinum að því undanskildu að þetta varði í góða fimm tíma og vorum við þá við skálann Setur. Voru þar allnokkrir vegslóðar og ber þar uppá það atvik sem olli ummælum Fluxtjórans hér að framan um rötunnarhæfileika Baskans.Við römbuðum á endanum á réttan slóða en beljandi jökulfljót varð okkur of mikill þrándur í götu svo að við snérum við að skála sem við töldum okkur muna eftir. Þegar þangað var komið rákur við allir upp gríðarleg hlátrasköll því það fyrsta sem mætti okkur þegar við opnuðum dyrnar á "skálanum" var allnokkuð magn af heyi. Innaf hesthúsinnu var þó lítið eldhús sem þeir sem ekki sváfu í heyinu gáttu hallað sér og sváfum við vel þar þá nóttina. Dagurinn á eftir var tíðindalítill að öðru leiti en því að við sáum feita guttann úr Fóstbræðrum. Við Gullfoss skildu leiðir því undirritaður, Eilífur og Jens fóru áfram meðan hinir stoppuðu til að skoða fossinn því Finninn átti að vera mættur í vinnu í Rvk. daginn eftir. Ferð okkar var tíðindalaus norður, en fengum við fregnir af Baskaskinni sem særð blygðunnarkennd stórs hóps Kana í lauginni á Hveravöllum. Á sá að hafa farið nakinn ofan í laugina og stuttu eftir þessi áðurnefndi hópur komið einnig. Ekki urðu menn þess varir að drengurinn væri strýpalingur sökum vatnsins fyrr en hópurinn hélt uppúr og fylgdu þá í kjölfarið skaðræðis öskur.
Líkur þar með tölu þessari.

Þú ert langt á eftir þínum samtíma minn kæri hr kjördæmi,...í þeim bransa er við loftin blá er kenndur er einn alheimstími við líði, þeas GMT, það sem áður hefur verið kallað UTC eða Zúlú tími eins og kaninn segir...Þannig er komist fyrir óþarfa misskilning sem að getur myndast eins og þegar þú flygur kl 1900 frá Kef og lendir kl1900 (að steðartíma) í New York.

Það er ljótt að heyra að Marinó gat ekki, þrátt fyrir mikinn frama í HÍ, reyknað úr hagnýtustu aðferðina til að lifa af bollann góða!!!

Núna er ég ný kominn úr Zúkku ferðinni miklu, þar sem hæst bar áning í Eldgjá....ég verð að segja að þetta var gríðarlega gaman. Það kom einna helst á óvart að sú þjálfun sem að Skátar og Súlur hafa lagt í skiluðu engu hvað kortatækni og GPS lestur varðar hjá okkar áskæra Baskaskinni, merkilegt....það er þá kannski ekki tilviljun að það eru alltaf hjálparsveitarmenn sem að þarf að leita af og bjarga af hálendinu.

Óni í tívolí
Um daginn gerðist sá fáheyrði atburður að stórlax úr viðskiptlífinu, starfsmaður Kaupþings og útskrifður nemandi með hæstu einkunn í 60 ára sögu viðskiptafræði í HÍ, ákvað að skella sér í tívolí á hafnarbakkanum í Reykjavík. Þvældist hann þar um í jakkafötunum með bindið hert upp í kok, innan um léttklædda og kærulausa unglinga sem hafa ekkert við tíma sinn að gera annað en hanga. Ákveður þá stórlaxinn úr viðskiptalífinu að sletta ærlega úr klaufunum, losar um bindið og kaupir sér miða í tívolítæki sem margir þekkja og oft er kennt við bolla. Þegar starfsmaður tívolísins verður jakkafatamannsins var, tekur hann sér þegar trygga stöðu við bollann hans. Til að gera langa sögu stutta komst jakkafatamaðurinn með herkjum heim til sín þar sem hann stakk feginn höfðinu ofan í klósettið og ældi eins og múkki það sem eftir lifði kvölds.

Þessar kenningar sem Gummi kynnir þarna fær mann tili að pæla í hvað sé langt í að tekin verði upp Alheimsklukka, þ.e. klukkan er það sama allsstaðar í heiminum. Þetta er að sjálfsögðu miklu hagkvæmara og þægilegra fyrir öll viðskipti, íþróttir og fréttir á þessum tímum þar sem veröldin er að þjappast saman og enginn nennir að reikna tímamismun lengur. Ég er ekki að segja að við ættum að breyta lífsmynstri okkar eftir þessu, fara að sofa klukkan 24:00 þó sólin sé enn hátt á lofti og miður dagur. Við förum þá bara að sofa klukkan 10:00, vöknum klukkan 17:00 borðum morgunmat og förum í vinnuna. Svo er fínt að fá sér ís í sólinni eftir vinnu svona um klukkan 1:00. Þetta eru bara tölur sem skipta engu máli.
Nú mundu margir segja að auðvitað skipti þær máli, sólin sé hæst á lofti klukkan 12:00 og lægst klukkan 00:00. Augljóslega ekki. Hérna á Íslandi er sólin hæst á lofti um klukkan 13:00 á sumrin svo að svona formlegar tölur eru hvort sem er komnar í klessu.

RE: Nýtt skipulag

Þessi maður hefur sennilegast verið sjúklingur, eða skyldur Marinó. Það er bara örfáum mönnum í þessum heimi sem dettur svona öfgafullar hugmyndir í hug. Þetta lítur svosem voðalega vel út á pappírunum, billegt og hagstætt, en engu að síður óframkvæmalegt með öllu. Eða eins og maðurinn sagði, lítur betur út í orði en á borði. En hvað hefur þetta svo kennt okkur? Jú, við eigum aldrei að treysta Svíum.

RE: Nýtt skipulag

Þegar ég lagðist til hvílu í nótt mundi ég meira um Svíann sem var að hanna nýtt skipulag.Hann vildi láta ,,samfélagið" vera í gangi allan sólarhringinn, þ.e. fyrirtækin og stofnanir áttu að vera með sömu starfsemi allan sólarhringinn. Þannig dreyfðist álagið jafnt yfir sólarhringinn og við losnum við þessa annatíma eins og kl. 8 a.m. og 5. p.m. sem alla ætla að drepa. Þetta sparar feykilegan kostnað í umferðarmannvirkjum sem síðan standa tóm meirhlutann af sólarhringnum. Sama má segja um ýmsar byggingar eins og skóla, verslunarmiðstöðvar, bíóhús o.s.frv. sem stendur ónotað þegar ,,samfélagið" sefur.
Alltaf sniðugir þessir Svíar :-)

Nýtt skipulagGulli þarf að fara hanna nýtt skipulag fyrir vestræn samfélög. Reyndar er hann ekki einn um þessar hugleiðingar því ég hef heyrt af kenningum Svía nokkurs sem hannaði vinnustímaskipulag þar sem engar helgar eða aðrir slíkir almennir vinnudagar voru til staðar. Ekki man ég hvernig þetta var nákvæmlega en frídagar hvers og eins færðust um einn dag í hverri viku og menn tóku bara út sitt ,,helgarfrí" þegar þeirra tími kom. Fyrirtækin og þjónustan var hins vegar til staðar alla daga vikunnar og alltaf sama þjónustustig. Þannig gátu menn notið þjónustunnar í fríunum sínum og ekki tapaðist sá tími sem Gulli talar um á mánudögum og föstudögum sem fer í að ræða um helgarnar.
Reyndar þarf ekki mikla hugarleikfimi til að sjá þetta fyrir sér en ég held að það sé ástæða fyrir því að við förum flest í helgarfrí og vinnum á svipuðum tímum, svo Gulli verður bara að læra lifa með því.

Tolleringar ættu augljóslega ekki að vera hluti af hverri helgi.
Nú hef ég verið að skoða nokkrar svona Bloggggg - síður, og mér finnst að Marínó ætti að reikna út hvað þetta kosti þjóðfélagið á ári þar sem allir virðast nota vinnutíma sinn í þetta sull.
Nema ég að sjálfsögðu, minn vinnutími er svo fullur af sulli að það kæmist ekki meira fyrir þótt ég reyndi.

Já Gulli, það er bara gaman að vinna frá 8 til 8, hver vill ekki vinna 24 tíma á sólarhring.....fáðu þér bara vinnu sem að þú getur skroppið úr

Opnunnartímar þjónustufyrirtækja

Loksins er ég búinn að borða, og klukkan nærri 1/2 2. Um þetta kenni ég þjónustufyrirtækjum hér í bæ. Af hverju er það að þjónustufyrirtæki hafa bara opið þegar allt annað eðilegt fólk er að vinna, væri ekki nær lagi að hafa opið á kvöldin þannig að maður þurfi ekki alltaf að vera múdda hluti í matartímanum. Já og síðan eru fyrirtækin jú oft með lokað í hádeginu. Þetta er meira að segja það slæmt að í þessum orðum ætti Bragi, þessi öðlingur, að vera kominn út í sveit til að ná í dekk sem ég bað hann um að redda fyrir mig því hann er einn af þessum heppnu mönnum sem vinna vaktavinnu og er því ekki jafn háðir hádegismúddinu og aðrir. Þetta er eingöngu gert af því að ég þarf að ná á dekkjaverkstæði fyrir lokun. Blessi þig Bragi.
Mér er líka alveg sama þegar fólk spyr hvenær fólkið í þjónustufyrirtækjunum eigi að sjá um sitt múdd, það getur bara skipt opnunnartímunum bróðurlega á milli sín og ekki allir haft opið sömu klukkutímana á kvöldin.
PS. Ég er búinn að redda felgum þannig að ég þarf ekki fleiri.

Þetta er óendanlega nýmóðins........

Vinnuvikan

Jæja, þá er helgin yfirstaðin og menn komnir í sínar launuðu vinnur á nýjan leik. Það er á stundum sem þessari sem ég er ekki alveg að höndla kerfið og velti fyrir mér hvort að effektív vinnuvika sé nokkuð lengri en svona rétt rúmir þrír dagar. Núna er ég til dæmis alveg við það að sofna og álít kraftaverki næst að mér takist að skrifa þetta. Þannig er ég búin að minnka afköst mín í dag af einhverju leiti (vona nú að það lifni aðeins yfir mér). Þetta væri svosem ágætt ef að síðari partur föstudagsins færi ekki í það að annað hvort hlakka til helgarinnar eða múdda eitthvað fyrir helgina. Þannig að nú er búið að skera a.m.k fremri helming mánudagsins og síðari helming föstudagsins úr þessari effektívu vinnuviku og það skilur eftir einhversstaðar á milli 3-4 daga til að gera eitthvað af viti. En þið megið ekki halda að þetta sé slæmur hlutur enda ættu tolleringar og burtreiðar að vera fastur hlutur af hverri helgi og ef það kemur niður á framleiðslugetu samfélagsins þá verður bara svo að vera.
PS. Ef einhver á fimmgata, 10 tommu breiðar felgur þá má sá hinn sami endilega hafa samband við mig.

Ótrúlegt en satt
Á ég að segja ykkur brandara? Það var einu sinni jafnréttisfulltrúi á Akureyri sem braut jafnréttislög. Þið ráðið hvort þið hlægið eða grátið.

Hversu dularfullt getur fólk verið? Ég sat í mestu makindum inn í vaktherbergi sundlaugar akureyrar að fylgjast með lífinu fyrir utan á sjónvarpsskjám, þegar ameríkani nokkur vindur sér inn á sundskýlunni og sest niður án þess að segja aukatekið orð. Þar sem mér fannst þetta frekar vandræðalegt fyrir okkur báða reyndi ég að hefja samræður um líðan okkar og daginn og veginn, sem gekk frekar styrt. Þegar hann hafði svo frætt mig um að hann væri landslagsarkítekt frá Seatle rauk hann allt í einu á fætur og stormaði út, og skildi mig eftir gjörsamlega tóman í hausnum. En guðurnir ákváðu loksins að miskuna sig yfir mig, og sendu mér norska stúlku á vegum nord-job til að eyða næstu sex vikum með. Spurnig hvort maður nái að toppa Marínó.......

Ánægjulegt að sjá að menn eru strax byrjaðir að tjá sig hérna á síðunni. Þeir sem eru ekki búnir að fá póst frá blogger.com um aðgang að blogginu er bent á að hafa samband við mig við tækifæri. Stál og hnífur er merki mitt, merki farandverkamanna... Berjumst saman bræður! Öreigar allra landa - SAMEINIST...

Sælir félagar!

Það sem er að frétta af mér er að núna kl. 09:00 stend ég yfir pottunum og er að hræra í snuddum og pelum. Eins og maðurinn sagði; Allt þarf að sjóða svo sterilt sé. Ég veit að höfðinginn hann Siggi Sæm er í svipuðum pakka og það verður gaman að bera saman bækur okkar um þann nýja heim sem við lifum í.
Ég ætla ekki að hafa þetta lengra en minni í heimasíður fjölskyldunnar, þ.e. bloggið mitt, bloggið hennar Guðrúnar Birnu og heimasíðu sonarins. Þaðan getið þið einnig fleytt ykkur á bloggið hennar Hilmu og þaðan yfir á bloggið hennar Ásu hans Sigga. Best er að fara bara inn á http://www.gummifreyr.blogspot.com/ og þaðan getið þið unnið ykkur áfram. Endilega farið inn á heimasíðu sonarins og skrifið honum smá kveðju í gestabókina.

Vonast svo eftir sögum að norðan um hábjargræðistímann.

Þetta er nú ægætt framtak hjá sigurði en það vesta er við það er að nú fá verkfræðinjörðar sem kunna html forgjöf því að þeir geta gert alskonar dularfullt við sinn texta. En eins og svo sem er vitað er algjör gúrkutíð enda segjir engin neitt á póstlistanum. Helsta sem er að frétta að mér er að ég vinn að því að verða meiri kapítalisti með því að spila golf í tíma og ótíma.

Æææði !!!!!

Molbúar komnir með heimasíðu!
Hinn óviðjafnanlegi Molbúavefur er nú loksins kominn í loftið. Er það von okkar allra að menn verði duglegir að rita spakar skoðanir á þessa síðu. Einhver tími mun þó væntanlega líða þar til síðan verður komin í endanlegan búning.
Voðalega fínt já!